Kumin 2024, July 27 thleng hian department hrang hrangah online RTI dilna 4889 a lut a, July thla chhung bik ah vawiin thlengin online RTI dilna 779 a awm bawk. A tam zawngin a danglam reng thung. Nitin 20 atanga 30 inkar Online RTI dilna awmziah anga ngaih a ni.

Mizoram RTI Online hi hmantheih turin July ni 1, 2022 khan Chief Minister Zoramthanga chuan Assembly Annexe Conference Hall-ah a tlangzarh a. India ram State leh Union Territory zingah Mizoram hi RTI Online nei thei pariatna a ni.

Right to Information (RTI) hmanga thil zawhfiah duh nei tuten office pana an kal ngai kher tawhlo a mahni awmhmun atanga smartphone emaw computer hmanga dilna siam mai theih a ni ta a, a hman dan pawh an siam awlsam hle.

Mizoram RTI Online hi website ah kalin emaw, mobile phone app-Playstore leh App Store atangin Android leh IOS device hmangtute tana download a hman theih a ni a, chhawrtu an pung hle a ni.

 

RTI Online software hi MSeGS (Mizoram State e-Governance Society) in a thlawna an siam a ni a, ISO certified a ni. State Data Centre-ah host in, payment gateway hman ni bawkin, office/department te’n treasury-a challan an buaipui a ngaih tawh loh phah a ni. RTI Online hman anih hnu hian office pana lehkha hmanga dilna thehluh chu khar a ni chuang lova, online leh offline a ti duhte tan a pangaiin a la kal reng.